Sustainable Fisheries Greenlandip, MSC-mit pappialaqarnernut kingornalu aalisarnerit ataasiakkaat tusarniaaffigineqartarnerannut atatillugu GFLK, suleqatigisuuaa. Suleqatigiinnerullu pingaarnertut tunngavigivaa aalisarnermit paasissutissanik paarlaasseqatigiittarneq uppernarsaasersuisarnerlu. 

GFLK Namminersorlutik Oqartussat ataani oqartussaasutut inissisimavoq. GFLK-llu isumagisarpai aalisarnernik, pisanik piniarnernillu nakkutilliinerit. GFLK-miillu pingaarnertut siunnerfigineqarpoq Namminersorlutik Oqartussat aalisarnermut inatsisaasa taakkuluu ataani maleruagassissiaasut naapertuisumik malinneqarnerisa isumannaarnissaat. Maleruagassianilu ilaapput nunanik allanik aalisarnissamik isumaqatigiissutit imal. suut Kalaallit Nunaata nunarsuarmi suliniaqatigiiffinni peqataaneranut tunngassuteqartut imal. aalisarnissamut atatillugu nunarsuarmi isumaqatigiissutaasut akuerineqarnissaat.

Kiisalu GFLK-mit anguniarneqarpoq aalisarnermut tunngasunik ilisimasanik katersisarnissaq isumannaarinnittarnissarlu, qulakkeerumallugit  aalisarnermi  nalimmassaalluni pilersaarusiornissanut tunngavissaqarnissaq aammalu aalisakkanik pisuussutaasut atornissaannut uumasulerisunit siunnersuinerit pitsaanerusumik tunngavissaqarnissaat.